Siglir tar il cuntegn
Inhalt

Exteriur Papa vul cumbatter abus sexuals pli rigurus

Avant in inscunter cun uvestgs dal Chile ha papa Francestg pretendì in agir pli consequent en cas d'abus sexuals.

Papa Francestg.
Legenda: Papa Francestg vul agir pli consequent en cas d'abus sexuals aifer la baselgia catolica. Keystone

Papa Francestg vul che abus sexuals na sa repetian betg. Perquai pretenda el, che la baselgia catolica tractia renfatschas d’abus pli consequentamain. La finamira saja, d'instradar midadas che tals acts detestabels na possian sa repeter. Quai ha il Vatican communitgà la sonda.

La communicaziun stat en connex cun il cas d'in uvestg dal Chile che duai avair zuppentà delicts sexuals d'in anteriur spiritual. Er il papa sez n’aveva anc il schaner betg prendì serius las renfatschas. Pli tard ha el dentant s'exculpà ch'el haja valità fauss la situaziun. Uss ha il papa clamà ils uvestgs dal Chile a Roma. Els duain rapportar dal cas.

RR novitads 12:00