Papa Francestg crititgescha la corrupziun en il Mexico

«Adina sch'i dat avantatgs per paucs è quai in terren fritgaivel per corrupziun e violenza» ha il Papa ditg all'entschatta da sia visita en il Mexico.

Il Papa Francestg cun si sombrero durant ses viadi en il Mexico.

Legenda da maletgs: Il Papa è vegnì retschavì cun entusiassem. Ils discurs cun il president Peña Nieto vegnan dentant in zic a la curta. Keystone

Oz ha il Pontifex tegnì in pled en il palaz da president a Mexico citad. Il Papa ha er fatg attent ch'i manchia la solidaritad sociala en quest pajais. Sch'i dettia avantatgs per paucs promovia quai betg mo corrupziun, mabain er il commerzi cun drogas, l'excluder da diversas culturas e la violenza, ha il Papa punctuà. En quai saja inclus il commerzi cun umans, rapinaments e mazzaments da persunas.

Violenza da drogas e migraziun

En il center dal viadi a Mexico, il pajais cun la segund blera populaziun catolica, stattan temas brisants sco per exempel la violenza entras drogas e la migraziun. Dapi onns dat i conflicts sanguinus tranter il stadi e cartels da drogas pussants. En tschertas regiuns è l'apparat statal schizunt infiltrà da bandas criminalas.