Papa discurra d’ina «Terra sontga» betg uschè sontga

En ses messadi da Nadal ha Papa Francestg appelà a la pasch en il Proxim Orient. Il messadi da la loggia dal dom da s. Peder e la benedicziun «Urbi et Orbi» èn in punct culminant dal Nadal cristian.

Il Papa ha appellà a la pasch en ils territoris da crisa sin quest mund.

Legenda da maletgs: Il Papa ha appellà a la pasch en ils territoris da crisa sin quest mund. Keystone

En ses pled al dom da s. Peder è il Papa sa fatschentà da Nadal cun la situaziun en il Proxim Orient. Gist nua che Jesus saja naschì, dettia quai vinavant tensiuns e violenza, ha ditg il parsura da la baselgia catolica davant 30'000 fin 40'000 persunas.

La plazza da s. Peder era quest onn segirada spezialmain pervi dal latent privel da terror. Milliuns han observà il messadi da pasch dal Papa via televisiun u internet.

Commemorà las unfrendas dal terror

Plinavant ha Francestg exprimì il desideri per ils Israelians e Palestinais da puspè vegnir en dialog direct in cun l’auter e da chattar ina cunvegna che lubeschia ad omadus pievels da viver ensemen en armonia.

A medem temp ha il Papa exprimì la speranza, che la violenza en la Siria saja bainprest a fin. Gist uschè impurtant saja quai, ch’ina regenza unitara en la Libia chattia il sustegn da tuts. Ultra da quai è el sa regurdà da las unfrendas dals attentats terroristics.

La benedicziun tradiziunala per il mund

Il messadi da la loggia dal dom da s. Peder e la benedicziun «Urbi et Orbi» («a la citad (Roma) ed al mund») èn in punct culminant dal Nadal cristian. Questa benedicziun dat il parsura catolic mintgamai da Nadal e da Pasca sco era directamain suenter si’emprima cumparsa sco Papa novelegì.

RR novitads 14:00