Siglir tar il cuntegn

Header

Navigaziun

cuntegn

Paneuropa Picknick Merkel engrazia a l'Ungaria

La Germania e l'Ungaria han commemorà l'emprima fugia en massa da burgais da la DDR avant 30 onns. La chanceliera tudestga ha engrazià per il sustegn cun avrir ils cunfins il 1989 e pli tard per l'unitad tudestga.

La chanceliera tudestga Angela Merkel ed il schef da regenza ungarais Viktor Orban han prendì part ad in act festiv a Sopron, en l'Ungaria dal vest.

Ils 19 d'avust 1989 avevan dapli che 600 burgais da la DDR nizzegià la demonstraziun paschaivla «Paneuropa-Picknick» – per fugir en il vest. Quest picnic saja daventà il simbol per ils gronds moviments da libertad da quest temp, ha ditg Merkel a l'act festiv.

Sopron è in exempel quant bler che nus Europeans pudain cuntanscher sche nus s'engaschain per nossas valurs nundividiblas.
Autur: Angela MerkelChanceliera tudestga

Ord il picnic haja dà la pli gronda fugia en massa ord la DDR dapi la construcziun dal mir il 1961. Ord il picnic haja dà in eveniment mundial, uschia Merkel. Il schabetg è stà in emprim indizi sin la crudada dal mir da Berlin il november dal 1989.

Merkel ha er en preschientscha da Viktor Orban menziunà ch'ils stadis da l'UE hajan abilitad da cumpromiss en dumondas dispitaivlas. Uschia ha ella visà sin la posiziun inflexibla da l'Ungaria en la dumonda da migraziun.

RR novitads 15:00