Siglir tar il cuntegn

Exteriur «Panama Papers»: Giustia a Genevra vegn activa

Ils rapports davart ils «Panama Papers» han emprimas consequenzas giuridicas en Svizra: La giustia dal chantun Genevra vegn activa. La procura publica haja avert proceduras, ha communitgà il procuratur general da Genevra. Detagls davart ils cas na possia el dentant betg dir.

Il president Juan Carlos Varela durant in pled.
Legenda: Il president Juan Carlos Varela reagescha sin las rinfatschas da la OECD. Keystone

En connex cun las retschertgas d’ina rait mundiala da schurnalists sin basa da las datas da l'advocatura Mossack Fonseca dal Panama eran cumparids ils davos dis era ils nums da pliras chanzlias d'advocats da Genevra.

Uschia èn er vegnidas citadas ils ultims dis questas chanzlias d’advocatura a Genevra. Ellas duain esser stadas involvidas tar la fundaziun da firmas da chascha da posta. Er davart las praticas da diversas bancas èsi vegnì rapportà.

Examinar praticas vertentas

Suenter las scuvertas enturn ils «Panama Papers» vul la regenza dal pajais incaricar ina gruppa d'experts per la branscha da finanzas.

Il president Juan Carlos Varela reagescha sin las rinfatschas da la OECD. Experts indigens e da l'exteriur vegnian ad examinar las praticas vertentas en la sparta da finanzas, ha ditg il president Juan Carlos Varela. Vitiers vegnia la cumissiun proponer mesiras per meglierar la transparenza da sistems da finanzas e da dretg.

RR novitads 06:00 / 14:00

Ils «Panama Papers»

Schurnalists avevan scuvert cun ils «Panama Papers» passa 200'000 firmas da chascha da brevs. Sinaquai aveva la OECD crititgà il Panama, ch'el na resguardia betg ils standards internaziunals. Bleras regenzas han entant annunzià inquisiziuns en chaussa. En l'Islanda è il primminister Sigundur David Gunnlaugsson stgarpitschà sur l'affera.