Siglir tar il cuntegn
Inhalt

Exteriur «Panama Papers» cuntanschan Buenos Aires

L’affera da «Panama Papers» extenda. Ils palpiris mettan entant er sut squitsch il president da l’Argentina Mauricio Macri. El duai avair taschentà davart sias participaziuns vid societads d’offshore.

Il president Mauricio Macri durant in pled.
Legenda: Il president Mauricio Macri va en l'offensiva. Keystone

In procuratur public ha entant instradà ina procedura penala cunter Macri. El haja dumandà infurmaziuns da las autoritads da finanzas e d'anti-corrupziun, uschia ha confermà il procuratur. Macri sez refusa las rinfatschas. El haja agì tenor las leschas, uschia ha el fatg a savair. Schebain ils fatgs tanschan per manar ina procedura penala cunter il president en uffizi, sto anc in derschader decider.

Macri da dosta cunter las rinfatschas

Macri è stà directur da duas societads d’offshore da ses bab sin las Bahamas, sco quai ch’i resulta dals «Panama Papers». A las autoritads da finanzas n’ha el para ditg nagut en chaussa. Il president sa dosta cunter las rinfatschas. El na saja betg stà acziunari da las societads, uschia che quai na saja betg visibel en sias decleraziuns da taglia. Avert resta però sche Macri ha survegnì indemnisaziuns da las societads e tut tenor betg declerà quellas a las autoritads da taglia.

RR novitads 06:00