Siglir tar il cuntegn

Header

cuntegn

Exteriur «Panama Papers»: Cameron conceda participaziun

Il primminister da la Gronda Britannia David Cameron ha concedì sia participaziun ad ina interpresas da chascha da brevs. Avant sia elecziun haja el dentant vendì sia cumpart.

Suenter ch’ils «Panama Papers» aveva purtà a la glisch ina participaziun da David Cameron vid ina firma da chascha da brevs ha il primminister concedì oz sia participaziun ad ina tala interpresa che appartegneva a ses bab mort. El haja possedì ina cumpart da 30’000 pfunds (40’000 francs) a la Blairmore Investment Trust ha Cameron ditg al emettur da televisiun ITV.

El haja vendì la cumpart da 5’000 aczias il schaner 2010 pia curt avant sia nominaziun sco primminister ha Cameron ditg vinavant. Avant dus dis aveva Cameron anc ditg che las fatschentas da sia famiglia sajan ina chaussa privata. Las medias en Gronda Britannia aveva rapportà da tals interpresas.

Il president da l'Argentina Mauricio Macri sut squitsch

Dasper Cameron è era il schef da regenza da l’Islanda Sigmundur David Gunnlaugsson sco er il president da l’Argentina Mauricio Macri sut squitsch. Gunnlaugsson è gia sa retratg da ses uffizi, cunter Macri è vegni instradà ina inquisiziun. La procura publica da l'Argentina ha concedì d'avair cumenzà cun investigaziun pervi dal suspect d'aviar zuppentà daners avant als autoritads fiscalas en l'exteriur.

RR novitads 21:00

Artitgels legids il pli savens