Siglir tar il cuntegn

Header

Navigaziun

In uffant che survign daguts da la vaccinaziun en bucca.
Legenda: Pakistan vul vaccinar 37 milliuns uffants en ils proxims trais dis. Reuters
cuntegn

Exteriur Pakistan: Vaccinaziun da polio per 37 milliuns uffants

Enfin mesemna vul il Pakistan dumagnar da vaccinar 95% dals uffants sut tschintg onns.

Il Pakistan vul menar tras las vaccinaziuns sut cundiziuns da segirtad fitg strictas. Millis da policists duain proteger las radund 100'000 equipas da vaccinaziun. Il coordinatur da l'acziun, Rana Safdar spera da pudair vaccinar uschia 95% dals uffants en il pajais.

Tenor l'organisaziun mundiala da la sanadad (WHO) èn il Pakistan e l'Afganistan ils sulets pajais ch'ins sa anc s'infectar cun polio. Polio è in virus fitg contagius. Tenor la WHO tutga il virus sur tut uffants pli pitschens. Ina da 200 infecziuns maina tar paralisas permanentas. Da quests infectai moran 5-10% perquai che las musclas da la respiraziun èn pertutgadas.

La protecziun da las equipas ha ses motiv

Ils onns passads han commembers dals Taliban radical-islamics adina puspè attatgà e mazzà tgirunzas, gidanters e policists durant acziuns da vaccinaziun en il Pakistan. Ils Taliban pretendan che muslims vegnian sterilisads entras la vaccinaziun.