Dasper la guerra civila uss er anc il coronavirus. Las autoritads en la Siria han annunzià in'emprima infecziun. Quella saja vegnida constatada tar ina persuna che saja arrivada da l'exteriur. Per cumbatter la pandemia vegnia tut il traffic public e privat interrut. Vias da colliaziun tranter las provinzas vegnian serradas.
Gia l'emna passada ha la Siria decidì da serrar las scolas ed universitads enfin ils 2 d'avrigl, sco era da desdir tuttas occurrenzas culturalas e sportivas. Las elecziuns dal parlament ils 13 d'avrigl han ins spustà sin ils 20 da matg.
En la Siria regia dapi nov onns ina guerra civila. Milliuns da persunas èn fugidas dals cumbats. L'Organisaziun mundiala da sanadad WHO, avertescha ch'il sistem da sanadad en la Siria na saja probabel betg abel da vegnir a frida cun la nova situaziun.