Cunquai po la Grezia sperar sin ulteriuras milliardas d'agid dals partenaris da l'UE enfin la fin da zercladur. La glista da refrumas saja fruntada sin acceptanza.
Ulteriurs consentiments èn necessaris
Tenor la scheffa dal Fond monetar internaziunal IWF, Christine Lagarde, tanschian ils plans da la regenza d'Alexis Tsipras per cuntinuar cun il program d'agid. Ella ha dentant crititgà che las propostas sajan enfin ussa memia pauc concretas. En tscherts pajais cumenzan ussa ils process da consentiment. En Germania per exempel sto il Bundestag decider davart la prolungaziun dal program. Quai capita probablamain il venderdi.
Tge prevesa la glista da refurmas da la Grezia?
En l'ultima minuta aveva la Grezia inoltrà a Brüssel la glista da refurmas pretendida. En quella fa Athen cler che guntgidas da taglia e corrupziun duain tutgar tar il passà. Il document da 7 paginas cun ils quals il pajais cun prolungar il pachet d'agid cumpiglia ils suandonts puncts:
- Politica da taglia
La regenza dal primminister Alexis Tsipras vul prender a mauns ina refurma da taglia sin plivalur. Plinavant duain las taglias vegnir retratgas a moda pli effizienta. La finamira saja en general da stgaffir ina “nova cultura da sa tegnair vid las prescripziuns da taglia”.
- Administraziun publica e giustica
La Grezia veglia in’adminsitraziun publica, hai num en las propostas da refurma. En il cumbat cunter la corrupziun e la lavada da daners vul la regenza ir avant pli sever cunter defraudaders. Concret vegn proponì da reducir il dumber dals ministers da 16 sin 10. Plinavant duain ils privilegis per ministers, deputads e funcziunaris vegnir reducids, quai tranter auter cun spargnar tar ils custs da viadi u ils supplements.
Plinavant duai il sistem da la giustia vegnir modernisà. Tranter auter duain ils cudeschs da lescha vegnir modernisads.
- Stabilitad da finanzas
La situaziun finanziala duai vegnir meglierada spertamain cun dapli entradas. La Grezia s’oblighescha da metter sin via ils leschas che pussibiliteschan da pajar ils debits e contribuziuns d’assicuranzas socialas anc betg pajadas. Quai duai succeder en cunvegnientscha cun l’UE, la Banca centrala europeica ed il Fond monetar internaziunal. La definiziun “Troika” per las instanzas da surveglianza duain vegnir evitada, enstagl vegn discurrì da “las instituziuns”
- Privatisaziuns
La regenza empermetta da betg prender enavos las privatisaziuns ch'èn gia succedias. Intenziuns da privatisar duain dentant anc ina giada vegnir examinadas.
RR novitads 17:00
