Siglir tar il cuntegn
Inhalt

Exteriur ONU vul serrar la spina da daners al Stadi Islamic

Il cussegl da segirezza da l'ONU vul engrevgiar a l'organisaziun terroristica Stadi Islamic (SI) da sa finanziar. El ha deliberà unanimamain ina resoluziun e dumandà tuts pajais d’agir cunter las pli impurtantas funtaunas da daners dal SI.

Il cussegl da segirezza da l'ONU durant la votaziun davart la resoluziun.
Legenda: Decisiun unanima: il cussegl da segirezza vul separar la milissa terroristica da sias funtaunas finanzalas. SRF

Il Stadi Islamic sa finanziescha per ina gronda part cun la cuntrabanda d'ieli e cun il commerzi illegal da bains culturals antics. Cun ina resoluziun vul il cussegl da segirezza da l'ONU separar la milissa terroristica da lur funtaunas finanzialas.

Chastiar «pli activ» ils finanziaders dal SI

Il cussegl ha era supplitgà tuts pajais da classifitgar la finanziaziun dal terrorissem en lur lescha naziunala sco in grev crim. Quai duai era succeder, sch'in pajais n'ha nagin direct connex cun in act terroristic. Plinavant duain ils stadis rinforzar il barat d'infurmaziuns areguard il terrorissem.

La gievgia è il cussegl da segirezza da l'ONU sa radunà per l'emprima giada sin stgalim da ministers da finanzas per deliberar il sboz per la resoluziun. Quel è vegnì elavurà ensemen dals Stadis Unids e da la Russia.