Siglir tar il cuntegn
cuntegn

Exteriur ONU intervegn cunter regenza dal Myanmar

Il secretari general da l’ONU Antonio Guterres ha danovamain appellà a la regenza dal Myanmar. Las intervenziuns militaras encunter la minoritad muslima dals Rohingya stoppian immediat vegnir sistidas, ha ditg Guterres a New York.

Blers fugitivs sin via sur cunfin.
Legenda: Myanmar: Radund 700'000 persunas da la minoritad Rohingya èn fugidas en il stadi vischin Bangladesch. Keystone

La regenza dal Myanmar aveva a curta vista aboli in termin d’ina visita tras represchentants da las Naziuns Unidas. Quella delegaziun vuleva visitar la regiun da conflict Rakhine en l’ost dal pajais. Tenor las indicaziuns da las Naziuns Unidas èn gia radund 700’000 persunas fugidas dals cumbats en il pajas vischin Bangladesch.

Bartga cun fugitivs sfundrada

Davant la costa dal Bangladesch è sfundrada ina bartga cun fugitivs Rohingya. A bord sa chattavan radund 130 persunas, scrivan las agenturas da novitads. I sa tractia da fugitivs dal Myanmar. Fin uss haja la guardia da costa chattà las baras da 19 persunas, passa 50 valian anc sco sparidas, rapportan las autoritads localas.

RR novitads 09:00