Siglir tar il cuntegn
cuntegn

Exteriur ONU: En Myanmar smanatscha catastrofa umanitara

Il secretari general da l'ONU Antonio Guterres saja «profundamain preoccupà da rapports dad excess» tar acziuns da las forzas da segirezza da Myanmar cunter ils Rohingya, communitgescha in pledader da las Naziuns Unidas a New York.

Fugitivs.
Legenda: Passa 38'000 Rohingya sajan gia fugids en il pajais vischin da Bangladesch, stiman insiders da l'ONU. Keystone

Suenter che radund 400 persunas han pers lur vita l’emna passada en acziuns da l’armada, ha el appellà a l’armada, da sa retegnair. El ha punctuà la responsabladad da la regenza da procurar per segirezza en la provinza da malruaus en il vest da Myanmar.

Il conflict en provinza en il vest dal pajais è escalà l’emna passada. Lura avevan rebels Rohyngia attatgà posts da la polizia e da l’armada en il nord da la provinza. Millis da persunas eran sin quai fugidas en il pajais vischin Bangladesch.

Tozzels dals fugitivs eran najentads en in flum da cunfin. Il venderdi sajan stads traplads anc 20’000 Rohingya al cunfin tar Bangladesch.

RR novitads 12:00

Ils Rohingya en Myanmar

Uffant en fugia.
Legenda: Ils Rohyngia – sulets tranter ils stadis. Keystone

Per la gronda part da la maioritad budista en il Myanmar sun ils Rohingya immigrants illegals e senza stadi, che vegnan dal Bangladesch. Quai malgrà che blers dad els vivan gia dapi generaziuns en il Myanmar. Ils Rohingya èn fitg paupers e valan sco ina da las minoritads las pli persequitadas en il mund. Dieschmillis èn gia fugids sur cunfin.