Siglir tar il cuntegn

Exteriur ONU discutescha tensiuns novas sin la Crim

Davos portas serradas ha il cussegl da segirtad da l'ONU tematisà las novas tensiuns tranter la Russia e l'Ucraina. Ier gievgia ha tratg ensemen la Russia schuldada sin la peninsla Crim.

Sco descrit sura.
Legenda: L'entrada serrada a la sala dal cussegl da segirtad da l'ONU. Keystone

Tenor l'ambassadur ucranais tar l'ONU haja la Russia tratg ensemen radund 40'000 schuldads sin la pensinsla Crim. La Russia motivescha quels moviments da truppas cun acts da sabotascha che l’Ucraina duessa avair planisà sin la peninsla. L'ambassadur russ tar l'ONU ha ditg, ch'el speria che l'Ucraina saja prudenta avunda per deescalar la situaziun.

Ucraina ha mess truppas en prontezza da cumbat pli auta

Els dus sesan cun fatscha seriusa a maisa.
Legenda: Mess lur truppas en la prontezza da cumbat la pli auta - il president ucranais Petro Poroschenko (a dretga) ed il schef dal cussegl da defaisa e segirezza. Keystone

Sco reacziun sin las activitads russas aveva er l'Ucraina activà sias truppas. Pertutgadas sajan unitads militaras en il ost da l’Ucraina sco era en la regiun da la Crim. Tenor il stab general datti dapi la mesemna exercizis militars en il sid dal pajais, dentant sajan quels stads planisads.

La Russia aveva annectà la peninsla da la Crim l’on 2014 – suenter ina votaziun dal pievel e durant ils gieus olimpics da Sotschi.

RR novitads 06:00