Sco l’OECD scriva regia en il Panama ina cultura da zuppentar. Il pajais stoppia uss realisar immediat standards internaziunals per la transparenza fiscala, scriva l’OECD. L'organisaziun internaziunala ha reagì sin las scuvertas d'ina rait internaziunala da schurnalists. En ils uschenumnads «PanamaPapers» aveva la rait da schurnalists scuvert passa 200’000 firmas da chaschas da brevs en differentas oasas fiscalas. Ils schurnalists èn sa referids sin datas d'ina chanzlia d'advocatura en il Panama.
In dretgira dal Panama duai sa fatschentar dal cas
Tenor la procura publica dal Panama saja uss vegnì instradà ina inquisiziun. Quella duai mussar, schebain ì haja dà crims e tge donns finanzials ch'i haja propi dà. Las scuvertas han mussà che numerus politichers, sportists e prominents han parcà lur daners en uschenumnadas firmas da chaschas da brevs per zuppentar quels avant las autoritads fiscalas.
Schef da regenza dal Islanda sut squitsch
Pervi da las scuvertas ord ils «PanamaPapers» vegn uss il schef da la regenza islandaisa David Sigmundur Gunlaugson sut squitsch. Millis persunas èn sa radunadas glindesdi saira avant il parlament en la chapitala Reykjavik ed han pretendì che Gunnlaugson sa retiria. El duai esser stà cumpiglià vid ina firma da chascha da brevs. L'opposiziun ha gia pretendì in votum da disfidanza en il parlament. Gunnlaugson na vul dentant betg sa retrair. El n'haja maina zuppà daners en l'exteriur ed er sia dunna che ha ertà da ses bab ina facultad, haja pajà tut la taglia correct en l'Islanda.
RR novitads 06:00