Odi criminal en la rait – regenza tudestga è preoccupada

En in rapport constatescha la regenza, che affrunts ed offaisas da livel criminal en la rait èn creschids l’onn 2015 cun 77% drasticamain. Quai è in fat che fa quitads a la regenza tudestga, rapportescha l’agentura da novitads dpa.

Ina tastatura, ina serradira ed in segn dad @.

Legenda da maletgs: L'odi criminal en la rait crescha ad in crescher - la regenza tudestga è preoccupada. Keystone

Las cifras derivan da la statistica criminala da la polizia da l’onn 2015: L’augment da 77% èn 10’373 cas – numnadamain tut cas ch’èn chastiabels e pertutgan uschia ina categoria criminala. Las cifras resortan dal rapport final dal dialog da burgais «Gutes Leben in Deutschland». Ils resultads dal 2015 èn in record negativ dapi il cumenzament da la statistica l’onn 2001.

Il rapport intunescha la discrepanza tranter il svilup ed in dals giavischs pli impurtants dals burgais, il giavisch dad ir enturn cun toleranza e respect in cun l’auter. En il palpiri atschertescha la regenza da vulair agir decididamain cunter quest svilup alarmant.

Il rapport duai vegnir discutà questa mesemna en il cabinet. Tranter avrigl ed october 2015 aveva la regenza tschertgà il dialog cun ses burgais. En retschertgas ed en 200 forums da discussiun èn sa participads radund 16’000 umans tar il dialog. En il center da quel steva la qualitad da viver en Germania.

RR novitads 15:00

L’odi criminal en la rait

  • sa mussa en offaisas ed affrunts chastiabels
  • sa drizza encunter posiziuns politicas, naziunalitads, colurs da pel u religiuns
  • è sa augmentà en Germania da 3’084 cas/2014 a 10’373 cas/2015