Siglir tar il cuntegn

Header

cuntegn

Exteriur Obama smanatscha a Moscau

Il president american Barack Obama vul vendetga per las attatgas da hackers russas durant il cumbat electoral per il presidi american. Sco Obama ha ditg veglian els reagir ma nua e cura decidian els.

Sco Obama ha ditg al emettur da radio NPR na dettia quai nagin dubi ch'els hajan d'agir, sch'ina regenza estra attatgia l'integritad da las elecziuns americanas e quai vegnan els a far ad in termin ed en in lieu ch'els decidian sez, ha ditg Obama. Avant aveva gia in collavuratur da Obama fatg allusiun ch'il president russ Wladimir Putin haja ina responsabladad directa per las attatgas ord la rait.

Emettur NBC News rapporta che Putin saja responsabel

L’emettur da televisiun NBC News ha rapportà ch’il president russ Wladimir Putin haja sez dà il cumond co agir cun ils mails da la candidata democrata per il presidi Hillary Clinton. L’emprim ord motivs da vendetga, quai pervi che Clinton aveva sco ministra dal exteriur mess en dumonda la legitimaziun da las elecziuns il 2011 en Russia.

Spiuns han dà las infurmaziuns decisivas

Pli tard haja Putin alura agir per discreditar il sistem politic american e mussar ch’el saja corrupt, ha rapportà l’emettur NBC. Las infurmaziuns sur da las attatgas russas èn para vegnidas da spiuns ed ord da circuls diplomatics d’alliads dals Stadis Unids, rapporta NBC.

La Russia dementescha

Sco in pledader da Putin ha ditg saja las rinfatschas ridiculas. Ed era il president elegi Donald Trump ha renvià las pretensiuns che la Russia possia esser responsabla per las attatgas da cyber sin la partida democrata.

L’emna passada aveva Obama ordinà ils servetschs secrets da intercurir da rudent las attatgas da cyber e da rapportar anc avant la fin da ses uffizi ils 20 da schaner 2017.

RR novitads 06:00

Artitgels legids il pli savens