Siglir tar il cuntegn
cuntegn

Exteriur Obama lauda Putin

Il president dals Stadis Unids da l’America Barack Obama ha ludà la Russia per sia tenuta tar la conferenza internaziunala davart la Siria a Vienna. La Russia saja stada in partenari constructiv ed haja empruvà da cuntanscher ina midada politica en Siria, ha ditg Obama.

Il president american, Barack Obama ed il president russ, Wladimir Putin
Legenda: Il president american, Barack Obama ed il president russ, Wladimir Putin Keystone

El ha bain fatg allusiun a las differenzas d'opiniun davart il futur dal schef dal stadi sirian, Baschar al-Assad. A Vienna hajan questas differenzas però betg impedì las discussiun davart pussaivladads per in armistizi. Tar la conferenza da la fin d'emna era vegnì decis in plan per surmuntar la guerra civila en Siria.

Serrar cunfins cun la Siria

Bainbaud dettia in'acziun da serrar ils ultims 98 km cunfin tranter la Siria e la Tirchia. Quai ha ditg il minister da l'exteriur american John Kerry a l'emettur CNN. Tar quest ultim toc da cunfin sa tractia d'ina part che stat sin la vart siriana sut la controlla da la milissa Stadi Islamic. Ils extremists nizzegian questa ruta per lur provediment. L'ulteriura part dal cunfin tranter ils dus pajais stat sut la controlla da truppas curdas.

RR novitads 10:00