Siglir tar il cuntegn

Exteriur Obama e Putin s’incuntran suenter passa 2 onns

Il president dals Stadis Unids Barack Obama e ses collega d'uffizi russ Wladimir Putin èn s'inscuntrads a l'ur da la radunanza generala da l'ONU. Igl è stà l'emprim inscunter uffizial dals dus schefs da stadi dapi passa 2 onns.

Wladimir Putin e Barack Ombama dattan il maun.
Legenda: Wladimir Putin e Barack Obama han discurrì davart ina collavuraziun en il cumbat cunter il Stadi islamic. Keystone

Il discurs saja stà fitg nizzaivel ed averts, ha Putin ditg suenter ch’els han discurrì durant bunamain 90 minutas. Tema dal discurs a New York saja stà la collavuraziun tranter la Russia ed ils Stadis Unids en il cumbat cunter il terrorissem. Els pondereschian communablamain davart mecanissems necessaris per lur collavuraziun.

Putin vul rinforzar l'agid militar per al-Assad

Perina sajan els che la milissa da terror Stadi islamic stoppia vegnir cumbattida. Tar la dumonda tge rolla ch’il president sirian Baschar al-Assad duai giugar, na datti nagin consens. Entant che Putin annunzià dapli sustegn militar per il president, aveva Obama numnà ordavant al-Assad in «tiran», che saja responsabel per la guerra civila en Siria.

RR novitads 06:00