Siglir tar il cuntegn
Inhalt

Exteriur Novas elecziuns en l'Italia

Via libra per novas elecziuns en l'Italia. Suenter ch'il senat ha ussa era approvà il preventiv 2018, po il president talian schliar il parlament e proclamar novas elecziuns.

sergio mattarella
Legenda: Observaders quintan ch'il president talian Sergio Mattarella schlia anc quest onn il parlament ed instradescha uschia novas elecziuns parlamentaras. Keystone

En l'Italia tut che spetga ch'il parlament vegnia schlià. Suenter la chombra dals deputads ha ussa era il senat approvà il preventiv. Il preventiv discutà cuntravers vul tranter auter, procurar per novas plazzas da lavur en il servetsch public e sbassar la taglia per fatschentas che recruteschan glieud giuvna u mettan sin digitalisaziun.

Italia dapi in onn senza primminister elegì dal pievel

Avant in onn aveva il primminister Matteo Renzi demissiunà suenter in referendum constituziunal. Las fatschentas aveva lura surpiglià il collega socialdemocratic Paolo Gentiloni - betg elegì dal pievel. Il pli tard il matg stoi dar elecziuns parlamentaras. Enconuschiders quintan ch'i dettia elecziuns l'entschatta mars, e ch'il president talian Sergio Mattarella schlia il parlament l'emna che vegn.

RR novitads 15:00