Siglir tar il cuntegn
cuntegn

Exteriur Nov decret cunter abort: Trump stritga contribuziuns

En ils Stadis Unids na duain organisaziuns che mainan tras aborts u che cusseglian dunnas davart l'interrupziun da la gravidanza betg pli survegnir daners dal stadi. Il nov president Donald Trump ha suttascrit in decret correspundent.

President american che suttascriva in document.
Legenda: Donald Trump suttascriva in decret. Keystone

Sco quai che l'agentura da novitads AP rapporta, sajan pertutgadas 60 organisaziuns da questa midada. Fin ussa vegnivan quella sustegnidas cun nov milliardas dollars ad onn.

Ordavant aveva Trump gia stritgà supplements dal stadi ad organisaziuns en l'exteriur che cusseglian davart l'abort. Quellas na survegnan nagins daners pli da l'agid per il svilup dals Stadis Unids da l’America.

Consentiment per pipelines dispitaivlas

Plinavant vul il nov president american Donald Trump tuttina laschar construir duas lingias d’ieli dispitaivlas. El haja suttascrit in decret correspundent. Quai ha communitgà la regenza a Washington.

Demonstrants a New York.
Legenda: A New York datti demonstraziuns cunter il decret en favur da las pipelines dispitaivlas. Reuters

Ina lingia duai manar ieli dal Canada en ils Stadi Unids. L’anteriur president Barack Obama aveva bloccà quest project per proteger l’ambient.

Per ina segund lingia aveva Obama incaricà las autoritads da tschertgar alternativas, perquai ch’ella pudess periclitar il provediment d’aua dals Indians.

RR novitads 06:00