Siglir tar il cuntegn
Inhalt

Exteriur Nov cas d'ebola en Liberia

Avant be dus dis aveva l’organisaziun mundiala da sanadad WHO annunzià la fin d’alarm per il virus ebola en l’Africa dal Vest. En la Liberia hai uss dà in nov cas d’ebola. En consequenza è ina dunna da 30 onns morta pervi dal virus.

Ina dunna lava ses mauns davant ina tenda improvisada.
Legenda: Malgrà la fin d'alarm è la situaziun en l'Africa dal Vest anc adina betg cumplettamain sut controlla (maletg d'archiv). Keystone

En la Liberia en l’Africa dal Vest è vegnì annunzià in nov cas d’ebola. Ina dunna da 30 onns e daventada unfrenda dal virus, cura ch’ella era en viadi per l’ospital en la chapitala Monrovia. Quai communitgescha l’organisaziun internaziunala da sanadad WHO.

Terminà alarm d'urgenza malgrà novs cas

Tenor indicaziuns da la WHO saja ina squadra da sanadad vegnida tramessa en la periferia da la chapitala per identifitgar persunas ch’han gì contact cun la dunna defuncta. La Liberia era vegnida declerada ils 14 da schaner per la terza giada sco libra d’ebola.

Er en il pajais vischin Guinea hai dà dapi la fin favrer otg novs cas d’ebola. Tuttina aveva l'organisaziun per sanadad mundiala WHO ditg ch'il stadi d'urgenza global pervi d’ebola saja terminà. En l'Africa dal Vest ha il virus chaschunà ils davos onns passa 11’000 morts.

RR novitads 18:00