Siglir tar il cuntegn

Exteriur Nicolas Sarkozy passenta notg en arrest

A l’anteriur president franzos vegn renfatschà d'avair finanzià ses cumbat electoral dal 2007 cun daners da la Libia. L’anteriur president franzos vegn interrogà da la polizia a Nanterre.

Dus politichers.
Legenda: Nicolas Sarkozy tar in inscunter cun Muammar al-Gaddafi il 2007 a Tripolis en Libia. Keystone
  • La polizia franzosa ha arrestà l'anteriur president Nicolas Sarkozy.
  • Sarkozy ha passentà la notg sin mesemna en fermanza.
  • Sarkozy duai avair finanzià ses cumbat electoral dal 2007 cun daners dal dictatur da la Libia Muammar al-Gaddafi. Concret giaja dad almain 50 milliuns euros.

Sarkozy è vegnì arrestà mardi en connex cun las investigaziuns areguard la finanziaziun da ses cumbat electoral dal 2007. Sarkozy vegn suspectà d’avair acceptà da lez temp daners illegals da la Libia. Ins discurria dad almain 50 milliuns euros. Quai rapporta l'agentura da novitads franzosa AFP.

L'investigaziun aveva cumenzà l'avrigl 2013. Tenor la gasetta «Le Monde» èsi dentant l'emprima giada che l'anteriur president franzos vegn interrogà en quest connex.

Grevas renfatschas

L'investigaziun cumpiglia il suspect da corrupziun, influenza sin il commerzi, falsificaziun e diever da falsificaziuns, abus da facultad d'interpresa, lavada da daners, sco er cumplicitad e zuppentada da quests delicts. Sarkozy refusescha tut las renfatschas. Anc durant ses temp en uffizi aveva el numnà las renfatschas «grotescas».

La polizia dastga tegnair Nicolas Sarkozy 48 uras en fermanza. Nicolas Sarkozy è stà president franzos dal 2007 fin il 2012.

RR novitads 10:00++