Siglir tar il cuntegn
cuntegn

Exteriur Nicolas Maduro duai avair violà ses duairs

Maduro na satisfetschia betg a la responsabladad en vista a la greva crisa politica ed economica en il pajais, ha il parlament, che vegn dominà da l'opposiziun burgaisa, argumentà.

Purtret da Nicolas Maduro.
Legenda: Nicolas Maduro stat vinavant en uffizi. Keystone

L'opposiziun pretenda en sia decleraziun da glindesdi ch'i duai dar novas elecziuns. La regenza n'ha betg acceptà la relaschada dal president. Gia ordavant aveva la dretgira suprema declerà ch'il parlament n'haja betg la cumpetenza da rinfatschar al president violaziuns dals duairs. Questa dretgira aveva gia franà ina votaziun planisada per relaschar Maduro.

Venezuela patescha dapi mais d'ina crisa economica e da provediment. Pervi dal bunmartgà pretsch d'ieli na posseda il pajais cun las pli grondas reservas d'ieli dal mund bunamain naginas devisas pli per importar rauba. Per quest onn spetga l'IWF, il Fond monetar internaziunal ina rata d'inflaziun da passa 1'600%.

Plinavant paralisescha il conflict tranter regenza e parlament il pajais. Il president socialistic fa responsabel ina conspiraziun da las elitas e da l'exteriur per la miserabla situaziun economica en il pajais.

RR novitads 07:00