Siglir tar il cuntegn

Exteriur Ni commerzi da perdun ni salvament dal mund

A la conferenza dal clima a Paris è il commerzi cun certificats d’emissiuns vegnì ludà ed igl è vegnì decidì da manar vinavant il sistem vertent. El saja tenor la cunvegna da Paris impurtant. Dumondas en chaussa datti però tuttina.

in chamin da fabrica cun bler fim
Legenda: Cumprar certificats d'emissiun enstagl da reducir sez las emissiuns. Keystone

Certificats d’emissiuns èn bain quels palpiris ch’interpresas cumpran per ch’els pon era vinavant tschufragnar l’aria, però cun ina conscienza netta? Quai ins pudess forsa interpretar uschia, però han els ina funcziun clera ch’è tranter auter era vegnì ludà da la chanceliera tudestga Angela Merkel a la conferenza dal clima a Paris. Sch’ils certificats pon però ademplir lur funcziun sco tgi tutga, quai pon ins dubitar.

Memia blers e memia bunmartgà

Sch'in certificat d'emissiuns vegn cumprà, sche munta quai, ch'ils daners vegnan investids per exempel en projects per energias regenerablas ni per la protecziun d'in guaud. Da preschent dettia quai dentant memia blers certificats sin il martgà. Uschia admoneschan per exempel era interpresas d’energia svizras sco la BKW Energie SA, il link avra en ina nova fanestra. La consequenza da l’offerta gronda da certificats è ch’il pretsch è pitschen. Per pudair emetter ina tonna CO2 paja ina interpresa en l’Europa da preschent per exempel € 8.50. Uschia na fetschia il cumprar certificats betg avunda “mal” a las interpresas.

En Svizra han interpresas grondas de lege da sa participar vid il commerzi cun certificats. Interpresas mesaunas pon, sch’ellas vulan. Tut tschels pajan la taxa da CO2.

En la cunvegna da Paris èsi vegnì francà ch’il commerzi cun certificats d’emissiuns duai ir vinavant.