Siglir tar il cuntegn
cuntegn

Exteriur Naginas elecziuns novas en Catalugna

Il schef da la regenza da la Catalugna, Carles Puigdemont refusa elecziuns novas. Bain haja el tratg en consideraziun quest pass, ma la fin finala sclaus el. Quai ha Puigdemont declerà a Barcelona.

Carles Puigdemont durant la sesida dal parlament regiunal.
Legenda: Carles Puigdemont durant la sesida dal parlament regiunal. Keystone

Tar ses pled a Barcelona ha Puigdemont annunzià da restar tar ses curs da fin qua. El na veglia betg elecziuns novas, mabain realisar il plan per declerar la regiun sco independenta da la Spagna, ha ditg Puigdemont. A Madrid rinfatscha Puigdemont d’impedir ina soluziun. El fissi stà pronts da proclamar elecziuns novas na senza garanzias davart da Madrid che talas elecziun possian vegnir manadas tras sut circumstanzas normalas na possia el betg far quest pass, ha ditg Puigdemont.

«Nagina regenza po acceptar in tal cumportament»

Suenter il pled da Puigdemont ha la regenza centrala a Madrid accentuà sia «obligaziun legala» da far ina fin als plans d'independenza da la Catalugna. «Nagina regenza po acceptar, ch'ina democrazia sviluppada na vala betg en ina part dal pajais dal tuttafatg – e quai è il cas en la Catalugna» ha ditg la vice-primministra Soraya Saénz de Santamaria. Sch'il senat spagnol approvescha damaun las mesiras da sforz, vul Madrid relaschar la regenza regiunala a Barcelona e far entaifer in mez onn elecziuns novas.

Tenor la gasetta «La Vanguardia» fiss la regenza spagnola stada pronta da desister da privar la regenza catalana da la pussanza en cas che quella avess proclamà elecziuns novas. Davart dals separatists catalans hai dentant dà resistenza cunter in tal pass.

Sesida cuntinuescha probabel damaun

Il parlament da la Catalugna cuntinuescha sia sesida probabel damaun. Era èsi pussaivel che l’independenza vegn proclamada. Era il senat a Madrid vegn a tegnair damaun ina sesida nua che la privaziun da la pussanza da la regenza catalana duai vegnir decisa.

Millis sin via a Barcelona

A Barcelona èn millis students ids sin via per demonstrar per l'independenza da la Catalugna e cunter ils plans da la regenza centrala a Madrid da privar la regenza regiunala catalana da la pussanza. Il moviment «Universitads per la republica» ed il sindicat dals students avevan clamà ad in di da chauma a las scolas autas en las citads grondas da la Catalugna.

RR novitads 18:00