Siglir tar il cuntegn

Exteriur Naginas colliaziuns da trens or da la Frantscha

En Frantscha ha ina chauma tar la societad da viafier statala SNCF paralisà bunamain l’entir traffic da viafier. Pertutgadas èn era las colliaziuns en Svizra.

Staziun vida
Legenda: Nua ch’igl ha normalmain glieud sco mustgas na ves’ins ina olma: la Gare du Nord a Paris. Keystone

Tenor ils sindicats han passa trais quarts dals locomotivists participà a la chauma. En il traffic a gronda distanza è cursà mo mintga otgavel tren, en quel regiunal mo mintga tschintgavel. Las colliaziuns en Svizra, Spagna e Italia èn vegnidas stritgadas dal tuttafatg.

Chauma duas giadas l’emna

La chauma duai durar fin la fin da zercladur e quai mintgamai durant dus da tschintg dis. I sa tracta dad ina seria da chaumas per cumbatter la refurma da la SNCF ch’il president franzos Emmanuel Macron vul.

Davent cun il status da funcziunari

Il punct central da la refurma è quel da stritgar il status da funcziunari dals collavuraturs da la viafier. Tras quest status eran ils collavuraturs fin ussa protegids da desditgas ed ils locomotivists pudevan, en media, ir en pensiun cun 54 onns.

Tenor la ministra dal traffic, Elisabeth Borne, na vul la regenza, malgrà ils protests, betg dar suenter. Ella tschertgia plitost il dialog cun ils sindicats. Sco Borne ha ditg, è in inscunter cun ils represchentants dals sindicats previs per gievgia che vegn.

Chauma era tar Air France

Era il traffic aviatic è disturbà pervi da la chauma. Tar Air France han ils collavuraturs fatg chauma per survegnir sis pertschient dapli paja.

RR novitads 08:00