Siglir tar il cuntegn

Header

cuntegn

Exteriur Nagina nova metro per Roma

Suenter che Roma na candidescha betg pli per ils gieus olimpics dal 2024 desista la citad er da las novas lingias da la metro.

La presidenta da la citad Virginia Raggi ha communitgà che la societad «Roma Metropolitane» vegnia schliada. La societad ch'era fin qua responsabla per la planisaziun da la nova metro haja gia duvrà milliuns, senza ch'il traffic public a Roma saja sa meglierà. 178 persunas perdan lur plazza.

En il visier da Raggi è surtut la lingia da metro C gartegiada. Questa lingia avess gi da colliar il quartier Prati en l'ost da la chapitala cun la centrala Piazza Venezia ed il Colosseum enfin tar la basilica Lateran. 25 kilometers e 30 staziuns eran uriundamain planisadas. Per quai èn fingia 3,7 milliardas euros vegnids investids.

La metro da Madrid ha custà 30 milliuns euros per kilometer. La lingia C da la metro ha Roma ha fin uss custà 135,2 milliuns per kilometer.
Autur: Virginia Raggi Burgamestra da Roma

La dunna da 38 onns ha empermess durant las elecziuns ch'ella veglia procurar per in'administraziun transparenta da la citad. Ella ha gudagnà las elecziuns cun gronda maioritad. Ils 19 kilometers da la lingia da metro ch'èn gia bajegiads duain vegnir inaugurads il 2021. Per suenter duai vegnir decidì sche la lingia vegn anc prolunghida.

Purtret da Matteo Renzi.
Legenda: Primminister Matteo Renzi n'è betg da cor cun Virginia Raggi. Keystone

Critica da primminister Renzi

Per questa decisiun ha il primminister Matteo Renzi crititgà Raggi. El aveva gia crititgà fermamain Raggi cu la candidatura per il gieus olimpics è vegnida retratga.

I na fa nagin senn da vulair franar gronds pojects d'infrastructura en l'Italia ord spira tema da sfarlattim u corrupziun. Empe ston ins procurar ch'i na dat nagins crims.
Autur: Matteo Renzi Primminister da l'Italia

RR novitads 15:00

Artitgels legids il pli savens