Nagina intermediaziun internaziunala

Cuntrari al president Catalan, Carles Puigdemont, na vul il president da la Spagna, Mariano Rajoy, nagina intermediaziun internaziunala en il conflict tranter la Spagna e la Catalugna.

In um cun ina bandiera da la Catalugna sur las spatlas en in'ustaria cun televisiun. Sin il visur ves'ins il retg Felipe VI.

Legenda da maletgs: Conflict tranter la Spagna e la Catalugna. Keystone

La regenza spagnola na vul nagina intermediaziun internaziunala per schliar il conflict tranter la Catalugna e la regenza. Quai ha communitgà il biro dal schef da regenza Mariano Rajoy a Madrid. Puigdemont stoppia en in emprim pass respectar la lescha vertenta da la Spagna. Pir lura possia dar in dialog.

Il president da la Catalugna, Carles Puidgemeont aveva pretendì ina tala intermediaziun. En ses pled aveva Puigdemont ultra da quai crititgà retg Felipe VI. Lez haja numnadamain surpiglià la tenuta da la regenza centrala ed uschia trumpà milliuns da Catalans – enstagl dad intermediar tranter las partidas da conflict. Retg Felipe VI aveva da sia vart crititgà la regenza regiunala da la Catalugna fermamain. Quai en connex cun il referendum davart l'independenza la dumengia passada.
RR novitads 06:00