Nagin agid svizzer en l'Italia

L'Italia refusa l'offerta da la Svizra da gidar a salvar las unfrendas dal terratrembel. Ina squadra dal corp svizzer d'agid umanitar fiss stada pronta. L'Italia haja engrazià per l'offerta, ha communitgà il Departament federal d'affars exteriurs EDA.

In pumpier stat a mez las ruinas ch'il terratrembel ha chaschunà.

Legenda da maletgs: Avant in'emna hai dà en l'Italia in terratrembel che ha chaschunà passa 290 morts. Keystone

L'Italia ha manegià ch'els sajan abels da dumagnar persuls la situaziun. La Svizra saja dentant pronta da gidar era pli tard sch'i saja necessari. Il terratrembel en l'Italia ha chaschunà passa 290 morts.

Agid finanzial è gia arrivà

Damai ch'i haja dà nagin clom per agid da l'Italia haja er la chadaina da fortuna betg lantschà in appel per donaziuns. La regenza taliana e las organisaziuns umanitaras al lieu hajan per il mument avunda meds per dumagnar la situaziun.

Acziuns da donaziuns han però blers privats ed organisaziuns ecclesiasticas, sco la Caritas lantschà. Passa 50'000 francs sajan tenor in represchentant da la Caritas, gia vegnids pajads a las organisaziuns en l'Italia.