En il Myanmar ha la regenza militara executà quatter activists per la democrazia. Els sajan vegnids sentenziads a la mort perquai ch’els hajan sustegnì acts da terrorissem, rapportan las medias statalas. I sa tracta da las emprimas execuziuns en il pajais da l’Asia dal Sidost dapi 1990. L’entschatta dal favrer 2021 aveva l’armada fatg in putsch ed arrestà la scheffa da regenza Aung San Suu Kyi.
In dals activists executads è Kyaw Min Yu, ch'è era stà enconuschent sut il num «Jimmy». L'um da 53 onns ha cumbattì per ils dretgs da democrazia dapi l'onn 1988 ed ha gia passentà 20 onns en praschun pervi da quai. In segund sentenzià è Phyo Zeya Thaw, anteriur star da hip-hop che ha silsuenter fatg il pass en la politica ed è daventà in stretg allià dad Aung San Suu Kyi.
Aung San Suu Kyi ha survegnì 1991 il Premi Nobel da la pasch per sias stentas cunter ingiustia sociala ed ina democratisaziun nunviolenta da ses pajais. Fin al 2010 ha ella passentà 15 onns en arrest da chasa, e dapi il putsch 2021 è ella puspè stada en arrest. Avant in mais è ella lura vegnida transferida en ina praschun.
