Siglir tar il cuntegn
Inhalt

Exteriur Mussar las cornas ad ina pratica crudela

Ils maletgs da vatgas cun ivers pli che plains ad exposiziuns duain prest appartegnair al passà. Cun examinaziuns dad ultra-sun vulan ils allevaturs da biestga cumbatter questa pratica gia a partir dal november. Quai rapporta l’agentura da novitads svizra SDA.

Vatgas anonimisadas, ins sa vesa be lur cornas.
Legenda: Tar bunamain 90% da las vatgas examinadas dal veterinaris eran ils tettels stuppads cun collodium. Keystone

Las examinaziuns cun ultra-sun vegnan prescrittas da nov en il reglament d'exposiziun. Quai communitgescha la Cuminanza da lavur dals allevaturs bovins svizzers ASR.

L'examinaziun dad ultra-sun lubeschia per l'emprima giada ina valitaziun objectiva, quant plains ch'ils ivers sajan, ha ditg Markus Gerber da l’ASR sin dumonda da l’agentura da novitads svizra SDA.

Cun 321 vatgas sviluppà sistem standartisà

Il perscrutader Adrian Steiner da l’Universitad da Berna ha fatg tests quest onn cun la metoda dad ultra-sun. Il departament per medizina veterinaria clinica da l’universitad ha examinà a quatter exposiziuns da muvel 321 vatgas rangadas top.

Uschia saja stà pussaivel da sviluppar per l’emprima giada in sistem standardisà per valitar quant plains ch’ils ivers da las vatgas èn per propi, ha explitgà Steiner a la SDA.

Betg be malempernaivel ma in privel per la sanadad

Ivers pli che plains n’èn betg be malempernaivel per las vatgas. Els mettan er en privel la sanadad dals animals. Las perscrutaziuns dals experts da l’Universitad da Berna han mussà en pli, ch’ivers pli che plains n’èn betg in maletg rar a las exposiziuns da muvel:

  • 72 animals (23%) avevan in edem da l’iver
  • 29 animals (16%) avevan rests da medicaments per reducir in’inflammaziun en il sang
  • 263 animals (86%) avevan ils tettels stuppads cun collodium, per ch’il latg na gutta betg or da l’iver durant la preschentaziun (questa pratica n’è betg reglada tras la lescha).

Mulscher immediatamain u survegnir in declassament da l'animal

L’examinaziun nova duai vegnir duvrada gia a partir dal november. Ils veterinaris e las veterinarias a las exposiziuns han lura il dretg da sancziunar ils possessurs da vatgas cun ivers pli che plains. Ina pussaivladad è da far mulscher la vatga anc sin il lieu.

En cas pli gravants saja tenor Markus Gerber da l’ASR er pussaivel, che las vatgas pertutgadas vegnian declassadas.

RR novitads 18:00