Anc mai è in cunvegna internaziunala vegnida suttascritta da tants represchentants da stadi en be in di, ha declerà il secretari general da l'ONU Ban Ki Moon. Quella haja la forza da midar il mund. L'era dal consum senza consequenzas è saja a fin, uschia Ban.
Stads preschents èn er il president franzos François Hollande ed il minister da l'exteriur american John Kerry. Per la Svizra ha suttascrit la ministra da l'ambient Doris Leuthard. Ratifitgescha il parlament la cunvegna conferma la Svizra ch'ella vul sbassar sias emissiuns da gas da serra per 50% sut il nivel dal 1990, quai fin 2030.
Tge prevesa la cunvegna?
La cunvegna dal clima vul limitar il stgaudament da la terra sin ina mesira cleramain sut dus grads e sche pussaivel sut 1,5 grads en cumparegliaziun cun il temp preindustrial. En la segunda mesadad dal tschientaner duai vegnir cuntanschì ina «neutralitad dals gas da serra». Plinavant s'obligheschan ils represchentants dal stadi da garantir las finanzas ch'i dovra per cuntanscher valurs d'emissiun bassas ed in svilup resisent cunter il clima.
RR novitads 20:00