Muhammad Ali ha pers ses ultim cumbat

La legenda da boxar americana è morta en la vegliadetgna da 74 onns, quai annunzian medias americanas sa referind sin la famiglia.

Muhammad Ali.

Legenda da maletgs: Muhammad Ali pativa dapi 32 onns da Parkinson. Keystone

Ali che pativa dapi 32 onns da la malsogna da Parkinson saja mort en in ospital a Phoenix. La carriera da boxar da l'icona ha cumenzà cun sia victoria olimpica il 1960 a Roma. Lura sa numnava el anc Cassius Clay. Pir tschintg onns pli tard cura ch'el è convertì tar l'islam ha el surpiglià il num Muhammad Ali.

Il 1964 è Ali vegnì per la prima giada campiun mundial en il pajs maximal. Silsuener ha el defendì onns a la lunga il titel. Ali ha procurà per cumbats nunemblidaivels sco il «Rumble in the Jungle» u il «Thrilla in Manila».

Il sportist dal tschientaner

Il 1967 è sia carriera però vegnida interrutta perquai ch'el ha refusà il servetsch militar durant la guerra dal Vietnam. El è vegnì arrestà ses titels èn vegnids annulads e per passa 3 onns n'ha el betg pli dastgà boxar. Set onns pli tard ha Ali lura puspè reconquistà il titel da campiun mundial cun la victoria da k.o. legendara cunter George Foreman a Kinshasa.

Il 1981 ha l'icona dal sport da boxar lura terminà sia carriera. Trais onns suenter ha Ali survegnì la diagnosa Parkinson. Ils ultims onns ha el adina puspè stuì vegnir tractà en l'ospital pervi da problems da sanadad.

Mund dal sport contristà

Il president dal Comité olimpic internaziunal, Thomas Bach, ha ditg che Ali saja stà in atlet ch'haja muventà ils cors dals umans sin l'entir mund. In atlet che saja s'engaschà lunsch sur il sport ora.

George Foreman ch'haveva pers il cumbat legendaric «Rumble in the Jungle» ha fatg a savair via Twitter ch'ina part dad el saja ida. L'anteriur campiun mundial Mike Tyson ha scrit, che Dieu saja ì per ses campiun.

RR novitads 07:00