Siglir tar il cuntegn

Exteriur Münster: Naginas raschuns politicas

Ad ina conferenza da medias ha la polizia confermà ch'ils motivs giaschian tar il delinquent sez.

Per l'amoc da Münster dad ier saira na datti tenor la polizia naginas raschuns politicas. Tar l'amoc èn duas persunas mortas. Anzi sajan ils motivs per l'amoc mortal da tschertgar en il delinquent sez, ha ditg il president da la polizia da Münster, Hans-Joachim Kuhlisch tar ina conferenza da medias dumengia a mezdi. Motivs islamistics u ideas da la dretga extrema na vesan las autoritads betg.

Il delinquent haja possedì quatter abitaziuns, duas a Münster e duas en l'ost da la Germania. Plinavant haja el er gì plirs autos. Vinavant ha la procura publica da Münster ditg che la polizia aveva gia gì da far cun il delinquent probabel. Las proceduras pervi da delicts pli pitschens il 2015 ed il 2016, sajan dentant tuttas vegnidas sistidas.

Operaziun d'urgenza

Suenter l'amoc ha la clinica da l'universitad gì da far pliras operaziuns d'urgenza. En tut vegnian tractads quatter persunas grev-blessadas, ha ditg ina pledadra la bun'ura. Ils investigaders tschertgan entant vinavant la raschun per l'amoc.

La clinica da l'universitad haja gì da tractar dapli che 20 persunas blessadas la sonda suentermezdi. Ella haja immediat infurmà tut ils collavuraturs a disposiziun. 250 medis e collavuraturs sajan stads a disposiziun en curt temp. Tschients persunas sajan plinavant suandadas la supplica da dar sang.

Il sa cuntegnair dals da Münster en questa situaziun è stà exemplaric.
Pledadra da la clinica da l'universitad

Um charrà cun transporter en fulla da persunas

In Tudestg da 48 onns è charrà ier cun in bus da campadi en glieud davant in'ustaria ed aveva mazzà duas persunas. Lura ha el fatg suicidi.

Nagins cumplizis tar amoc

La polizia na tschertga nagins cumplizis tar l'amoc da sonda a Münster. I na dettia naginas indicaziuns che ulteriuras persunas sajan stadas involvidas en il crim. La polizia era sco emprim suandada a fastizs da perditgas che hajan vis duas persunas che sajan siglidas or da l'auto dal delinquent.

RR novitads 15:00