Siglir tar il cuntegn

Exteriur Münster: Nagin act terroristic

Las autoritads tudestgas han entant confermà ch'i na sa tractia betg d'ina attatga terroristica.

  • Duas persunas èn mortas ed almain 20 ulteriuras blessadas cura ch'in transporter pitschen è charrà en ina gruppa da persunas. Plirs blessads sajan anc en privel da vita.
  • Il delinquent suspectà ha commess suicidi anc sin il plaz, ha ditg in pledader da la polizia. Tut en tut hai pia dà trais unfrendas.
  • Suenter l'incident cun il delinquent ha la polizia supplitgà la populaziun da guntgir la part da la citad pertutgada, enturn l'ustaria «Kiepenkerl».

A Münster en Germania è in transporter pitschen charrà la sonda en ina fulla da persunas che sesevan davant in'ustaria. L'automobilist ha mazzà uschia duas persunas e blessà almain 20 ulteriuras. Suenter quai ha il delinquent suspectà sa sajettà giu, uschia la polizia.

Tenor la polizia hai dà currellas che duas ulteriuras persunas sajan stadas en l'auto e sajan mitschadas. Qua na saja dentant anc betg segir, ha ditg la polizia. Plinavant ha la polizia chattà en il transporter in object suspectus. Perquai saja il lieu dal delict vegnì barricadà cun gronda distanza, uschia in pledader da la polizia la sonda.

Nagin act terroristic

Tenor las autoritads na sa tracti betg d'in act terroristic. Per il mument na dettia nagins indizis en questa direcziun, ha ditg Herbert Reul, il minister da l’intern dal Bundesland Nordrhein-Westfalen. L’attatgader era in Tudestg. El sa saja sajettà en il transporter suenter l’amoc, uschia Reul.

La «Süddeutsche Zeitung» scriva ch'il delinquent suspectà saja crudà si psichicamain. L'abitaziun dal delinquent vegnia intercurida. Da quai na datti il mument dentant nagina conferma uffiziala.

Regenza condolescha

La regenza saja infurmada. Las investigaziuns giajan tuttas forzas enavant. Davart detagls n'ha la polizia dentant anc tradì nagut. La regenza condolescha a las unfrendas ed als parents. «Noss patratgs èn tar las unfrendas e lur parents», ha scrit Ulrike Demmer, la pledadra da la regenza a Nordrhein Westfahlen.

RR novitads 17:00+