Millis Palestinais han il venderdi cumenzà a protestar cunter l'Israel. Tranter auter hai er dà in «marsch al return». A quel èn tenor medias localas radund 20'000 persunas participadas.
1'400 blessads
Almain 18 dals demonstrants èn morts tar confruntaziuns cun l'armada israeliana ed ulteriurs 1'400 èn vegnids blessads. Quai ha ditg l’ambassadur palestinais tar las Naziuns Unidas a New York.
L'armada israeliana ha discurrì da sis lieus da protest. Ils Palestinais hajan rullà pneus ardents envers las schuldada e bittà crappa. Ils demonstrants cumbattan per il dretg da fugitivs palestinais da turnar en regiuns ch’appartegnan uss a l’Israel. L’Israel refusescha quai.
Armada israeliana sajetta cun intenziun
Ils schuldads hajan sajettà cun intenziun sin manaders da la revolta. L'armada veglia uschia impedir ils demonstrants da l'organisaziun da terror Hamas, quella saja responsabla per las demonstraziuns e saja «privlusa per ils civilists». La Mesa Glina Cotschna palestinaisa discurra da passa 200 Palestinais ch'èn vegnids blessads entras sajets.
Chalil al-Haja, in impurtant commember dals Hamas ha dentant fatg attent, ch'i saja ina demonstraziun ruassaivla. Perquai sa participeschian er uffants e dunnas als protests.
Liebermann avertescha da s'approximar al cunfin
Il minister da defensiun israelian Avigdor Lieberman ha avertì la glieud da betg s'approximar a las saivs da cunfin. Mintgin che s'approximeschia al cunfin, ristgia sia vita. L'armada ha numnadamain posiziunà pli che 100 tiradurs spezialisads tar las saivs da cunfin.
«Di dal terren» dat chaschun da protestar
Cumenzà han ils protests l'uschenumnà «di dal terren» ils 30 da mars. Quel regorda a la terrada violenta dals protests da purs arabs cunter l'expropriaziun da lur terren en il nord da l'Israel il 1976.
Ils protests duain anc cuzzar enfin ils 15 da matg. La raschun per ils protests èn las festivitads a chaschun dal 70avel anniversari da la fundaziun dal stadi Israel. Ils Palestinais numnan il di da fundaziun da l’Israel il «di da la catastrofa». Durant l'emprima guerra da l'Orient Proxim il 1948 eran radund 700'000 Palestinais vegnids chatschads u eran fugids.
Guterres pretenda scleriment
Il secretari general da l'ONU, Antonio Guterres, pretenda in'examinaziun independenta da las acziuns da violenza tar ils protests palestinais en la Strivla da Gaza. Ins duai examinar co ils umans sajan vegnids mazzads u blessads, ha ses pledader ditg a New York.
Vitiers appelleschia Guterres a tut ils responsabels da desister d'acziuns che mainian a anc dapli unfrendas ed el accentuescha la prontadad da las Naziuns Unidas da sustegnair activitads en favur da la pasch en l'Orient Proxim.
RR novitads 16:00