Siglir tar il cuntegn
Inhalt

Exteriur Mortalitad d''uffants è sa reducida per 53%

La mortalitad d'uffants è sa sminuida dapi il 1990 per passa la mesadad. Tenor l'ONU èn morts lura 12,7 milliuns uffants sut 5 onns. Quest onn vegn quai ad esser 5,9 milliuns. La finamira da l'ONU, da reducir ils mortoris d'uffants sin 2/3 fin il 2015, na saja uschia betg vegnida cuntanschida.

mamma tegn ses uffant sutalimentà en bratsch
Legenda: In uffant sutalimentà en il bratsch da sia mamma. Keystone

Quest onn saja dentant l'emprim onn nua che la mortalitad croda sut 6 milliuns uffants. Mintga di moran en media 16'000 uffants e quai malgrà che las bleras raschuns da mort fissan evitablas, uschia statti en il rapport da l'organisaziun mundiala da sanadad WHO, da l'ovra d'agid d'uffants UNHCR, da la banca mundiala e da la partiziun per fatgs economics e socials da l'ONU (UNDESA).

Sper las naschientschas prematuras èn ils motivs per la mortalitad d'uffants il pli savens malcostas (puntga), cumplicaziuns tar la naschientscha, diarrea (sfuira), tissientada dal sang u Malaria. 45% dals mortoris capitan ils emprims 28 dis da vita e tar bunamain la mesadad dals mortoris gioga la sutalimentaziun ina rolla. Las pli autas quotas da mortalitad registreschan anc adina l'Africa en il sid da la Sahara e l'Asia dal sid.

RR novitads 06:00