Siglir tar il cuntegn

Header

cuntegn

Exteriur Mort en massa da focas al Lai da Baical

Al Lai da Baical en Sibiria èn passa 140 focas vegnidas chattadas crappadas a la riva. Quai communitgeschan las autoritads russas.

Tut las focas ventschidas sajan creschidas e fermas. Per gronda part sa tracti da femellas purtantas. Tge ch'è la raschun per la mort en massa na saja betg cler. Ins n'haja betg chattà virus u auters parasits. Biologs teman uss in'epidemia.

Focas periclitadas

La foca vala sco simbol dal Lai da Baical. Ella è ina da las paucas focas che viva en aua dultscha. Ella viva exclusivamain en il Lai da Baical. Quel è cun 600 kilometers e cun ina profunditad da 1'600 meters in dals pli gronds lais d'aua dultscha sin il mund ed in center da turists fitg popular. Las autoritads russas quintan che 128'000 focas vivan là.

Nagins virus

Ils animals ventschids èn ils davos dis vegnids chattads en la regiun Irkutsk en il sid dal lai Baical. Tenor primas analisas èn las focas mortas d'ina fermada dal cor. Ins n'haja betg chattà virus u auters parasits. I pudess esser ch'ellas sajan morta pervia da sutalimentaziun. Las focas sa nutreschan tranter auter da peschs. Ma pertge ch'ellas n'hajan betg mangià na saja betg cler.

RR novitads 10:00

Artitgels legids il pli savens