Siglir tar il cuntegn

Exteriur Mo da principi

Da lur inscunter da crisa a Brüssel èn ils ministers da l'intern da l'Uniun europeica sa cunvegnids mo da principi da reparter 160'000 fugitivs.

fugitivs spetgan a la staziun da Salzburg en l'Austria
Legenda: Ils ministers da l'intern da l'UE n'èn anc betg sa cunvegnids definitiv da reparter 160'000 fugitivs. Keystone

Ils ministers èn sulettamain sa cunvegnids ch’els veglian reparter ils fugitivs. Ina decisiun definitiva saja planisada per ils 8 d'october, ha ditg il minister da l'intern da la Germania, Thomas de Maizière. La quota lianta che la cumissiun da l'UE aveva proponì per ils stadis commembers n'haja anc betg chattà ina maioritad.

Gia decis definitiv è co reparter 40’000 fugitivs sin ils stadis commembers. Tenor il minister da l’intern da la Germania sajan ins era sa cunvegnids, ch’ils fugitivs vegnian registrads en centers da retschaviment.

Reacziun svizra

La presidenta da la Confederaziun, Simonetta Sommaruga, è fitg trumpada ch’ils ministers dal intern da l’UE n’han betg chattà ina via co reparter ils fugitivs sin ils stadis commembers. Ella pretendia gia dapi onns ina tala clav da repartiziun, ha Sommaruga ditg suenter l’inscunter a Brüssel. Sulet cun ina clav da repartiziun possia la politica d’asil esser solidara.

Sch’ins haja ils ultims onns mess las prioritads sin ils interess naziunals enstagl da soluziuns communablas, alura na possian ins betg cuntanscher las finamiras entaifer paucas emnas, ha ditg Sommaruga.

RR Novitads 06:00