Siglir tar il cuntegn

Exteriur Ministers da l'UE pretendan controllas sistematicas

Suenter las attatgas a Paris vulan ils pajais da Schengen pussibilitar controllas sistematicas al cunfin extern da l'Uniun Europeica. Questa pretensiun fan ils ministers da l'UE a la cumissiun da l'UE ad ina seduta d'urgenza.

policists fan controllas severas
Legenda: Il cunfin exteriur da l'UE duai vegnir controllà sistematicamain (maletg simbolic) Keystone

La Frantscha aveva clamà a questa sesida per reagir sin las pannas ch'i ha dà l'ultim temp en il cumbat cunter il terrorissem.

Entras las controllas sistematicas e permanentas duain vegnir chattads en l'avegnir burgais europeics ch'èn viagiads sco cumbattants dal Dschihad en la Siria u l'Irac e che returnan. Er l'islamist beltg Abdelhamid Abaaoud, il planisader ed organisatur supponì da las attatgas a Paris, è stà en la Siria e lura viagià tras l'Europa.

La mesemna è Abaaoud mort tar ina razzia da la polizia a Saint-Denis, in quartier da Paris. Atgnamain avev'ins quintà che Abaaoud saja en la Siria. Il minister da l'intern franzos Bernard Cazeneuve ha planschì che la Frantscha n'haja gì naginas infurmaziuns da las autoritads d'auters pajais da l'UE che l'islamist saja viagià tras l'Europa.

RR novitads 07:00