Siglir tar il cuntegn
Inhalt

Exteriur Minca spetga ulteriurs 11'000 fugitivs

La Baviera spetga l'arrivada da plirs milli fugitivs. Sco quai ch'il president da la regenza di, saja da quintar cun 11'000 u dapli persunas. La situaziun saja fitg tendida.

fugitivs vulan entrar en in tren, ina policista observa la situaziun
Legenda: Adina dapli fugitivs arrivan en la Germania, las capacitads sa sminueschan plaunet. Reuters

Gia la fin d'emna eran arrivads en la Baviera da quai da 20'000 fugitivs.
Las autoritads avevan perquai mess a disposiziun ulteriurs 2'500 letgs per fugitivs.

Quai surpassia lur spetgas ed els vegnan a las limitas. Las capacitads sa reduceschian marcantamain, uschia la regenza.

Tenor indicaziuns austriacas èn var 15'000 persunas vegnidas la fin d'emna sur il cunfin nà da l'Ungaria. Las pli bleras sajan viagiadas vinavant en la Germania. L'Austria ha era annunzià da terminar pass per pass las mesiras d'urgenza en connex cun ils passagis da fugitivs ord l'Ungaria en la Germania. Vitiers dettia quai puspè controllas da persunas parzialas al cunfin cun l'Ungaria, ha declerà il chancelier austriac, Werner Faymann. Cura ch'i vegn cumenzà concret n'è anc betg cler. La situaziun al cunfin a Nickelsdorf en il Burgenland è sa normalisada.

Ungaria appellescha da serrar ils cunfins

L'Ungaria ha appellà a la Germania e l'Austria da serrar ils cunfins per ils fugitivs. Uschiglio vegnian adina dapli migrants en l'Europa. Quai ha ditg il primminister ungarais Victor Orban envers l'emettur austriac ORF.

Cun laschar entrar ils fugitivs en l'Uniun europeica senza documents haja l'Austria cuntrafatg a las reglas. Ina gronda part saja numnadamain fugitivs economics, uschia Orban. Il venderdi eran la Germania e l'Austria sa cunvegnidas d'avrir ils cunfins per tut fugitivs bloccads en l'Ungaria, quai senza controllas.

RR novitads 22:00/06:00