Siglir tar il cuntegn
cuntegn

Exteriur Militar sirian snega d'avair bumbardà champ da fugitivs

Il militar da la Siria ha snegà scadina responsabladad per il bumbardament d'in champ da fugitivs datiers dal cunfin tirc. I dettia infurmaziuns ch'organisaziuns terroristicas hajan attatgà l'ultim temp cun l'intenziun da tutgar miras civilas. Quai ha declerà l'armada siriana.

Numerusas baras èn pachetadas en satgs alvs che giaschan giun plaun
Legenda: Attatga sin in champ da fugitivs en Siria. Keystone

L'opposiziun en la Siria aveva fatg responsabla la regenza siriana per l'attatga ord l'aria sin il champ da fugitivs en la provinza Idlib. Tar l'attatga èn mortas almain 28 persunas, tranter questas era dunnas ed uffants.

ONU condemnescha attatga sin champ da fugitivs

Sch'il champ saja vegnì tschernì sapientivamain sco mira pudessi quai sa tractar d'in crim da guerra ha ditg il coordinatur d'urgenza da l'ONU Stephen O'Brien. El pretendia in'examinaziun independenta.

Tenor il post d'observaziun sirian èn 28 persunas vegnidas mazzadas tar l'attatga ord l'aria dad ier saira. 50 ulteriuras sajan blessadas. Tgi ch'è responsabel per l'attatga al cunfin tirc n'è il mument anc betg cler.

73 morts tar cumbats datiers d'Aleppo

Datiers da la citad siriana Aleppo èn vegnidas mazzadas il venderdi passa 70 persunas tar cumbats tranter las truppas da la regenza ed unitads da la front Al-Nusra.

Als rebels saja quai reussì da dumagnar sut controlla Chan Tuman, il lieu che sa chatta datiers d’ina via impurtanta che collia Damaskus ed Aleppo. Quai rapporta il post d'observaziun sirian per ils dretgs umans.

La conquista dals lieus tras milissas terroristicas mussia che las lingias da defensiun da la regenza en il sid da la Siria sa retirian, ha ditg Rami Abdel Rahmane, il directur dal post d’observaziun.

Cumbats cuntinueschan

Suenter duas emnas cun ferms cumbats era ida en vigur ina nova pausa da cumbat en la citad nord-siriana Aleppo. La pausa da cumbat era vegnida resguardada per gronda part.

Entant cuntinueschan ils cumbats en la Siria, malgrà pausas da cumbat regiunalas. Pir la gievgia aveva quai dà infurmaziuns davart attatgas sin in champ da fugitivs en il nord dal pajais; 30 persunas duain esser vegnidas mazzadas.

RR novitads 06:00 / 10:00