Siglir tar il cuntegn
Inhalt

Exteriur Midada da trend tar Apple?

L’iPhone na persvada betg pli sco anc avant intgins onns, in nov hit na para è betg d’esser en vista: Apple fa per l’emprima giada dapi il 2003 damain svieuta. Ed er las perspectivas n’èn betg suleglivas.

In visur d'in telefonin ed il logo dad Apple.
Legenda: Duas terzas da la svieuta dad Apple vegnivan da la vendita dad iPhones. Reuters

Il concern d'electronica american Apple ha per l'emprima giada vendì damain iPhones dapi che quel è sin il martgà il 2007.

Svieuta sfundra per l'emprima giada dapi il 2003

Ils ultims trais mais è la vendita dal pli impurtant product dal concern ida enavos per 10 milliuns sin radund 51 milliuns iPhones. En consequenza sto Apple nudar damain svieuta e gudogn, quai per la prima giada dapi 13 onns

Dal schaner fin il mars è la svieuta sa reducida per 13% sin radund 50 milliardas dollars. Sut il stritg ha Apple anc gudagnà 10 milliardas, quai ch'è 23% pli pauc che l'onn avant.

La fiera ha reagì tementada. Analists avevan fatg quint cun meglras cifras tant per il segund sco per il terz quartal da fatschenta. En consequenza ha l’aczia dad Apple pers 8% e vala dapi il favrer per l’emprima giada damain che 100 dollars.

I manca in nov success da vendita

La fatschenta dad Apple patescha dal fatg che bleras persunas han entant in smartphone. Samsung è daventà la forza dominanta dal martgà ed er auters concerns Asiats sco Xiaomi, Lenovo u Huawei fan concurrenza al pionier cun lur agens novs telefonins.

Suenter l’iPod, l’iPhone ed il tablet iPad èsi difficil per Apple da chattar in nov garant per la svieuta. L’ura computerisada Watch na para betg d’esser il hit desiderà.

RR novitads 06:00