Siglir tar il cuntegn
Inhalt

Exteriur Mexico/U.S.A. – traffic da drogas sutterran raffinà

En la California en ils Stadis Unids han las autoritads scuvert in tunnel da 730 meters per transportar drogas. Per grond’attenziun procura l’equipament raffinà dal tunnel.

Il tunnel è occupà cun in lift, glischs, conducts d'aria e binaris per il transport. El maina dad ina chasa a Tijuana en il Mexico sur il cunfin sin in terren ad Otay Mesa en la California, ha communitgà la procura publica responsabla. Là era cuvernada l’entrada en il tunnel dad in grond container da rument.

Acziun cunter la cuntrabanda da drogas

Las autoritads han surprais ils cuntrabandists da drogas cura ch’els eran vi da chargiar in camiun. En l’acziun èn vegnids arrestads 6 suspectads. Las autoritads han confiscà ina tonna cocain e 6 tonnas mariuana.

In auter tunnel raffinà - il tunnel da fugia dad «El Chapo»

Gia l’onn passà aveva procurà in auter tunnel mexican per attenziun mundiala. Lura era scappà il boss da drogas mexican, Joaquin «El Chapo» Guzman, da sia duscha en praschun. Là era vegnì construì in tunnel da passa 1kilomter lunghezza, ch’era equipà schizunt cun in töf per che Guzman possia scappar. La fugia ha dat rumpatesta a la regenza Mexico e procurà ad ella difficultads diplomaticas cun ils Stadis Unids.

Il boss da drogas pli tschertgà dal mund è dapi il schaner 2016 danovamain en praschun.

RR novitads 06:00