La Germania prenda ulteriuras mesiras per cumbatter la pandemia da corona. Sin quai èn la regenza tudestga e ils Bundesländer vegnids perina. Las reglas da 2G che valan gia per intgins Bundesländer duai vegnir schlargiada sin l’entir pajais. En butias sco era a occurrenzas culturalas e dal temp liber pon en l’avegnir be anc ir persunas vaccinadas e guaridas. L’excepziun èn butias per ils basegns dal mintga di. En las scolas vala in obligatori da mascras e clubs e discos ston serrar sche il dumber da cas è memia aut.
Ulteriuras mesiras
Avrir la boxSerrar la box
2G per occurenzas da sport, pinavant maximal 50% da la capazitad dal stadion u maximal 15'000 aspectaturs, endadens max. 5'000.
Clubs e bars ston serrar tar ina incidenza sur 350, quai è momentan il cas en radund la mesadad da la Germania.
Tar sentupadas cun persunas betg vaccinadas u guaridas dastgan be duas chasadas sa scuntrar.
Nagin fieu artifizial da silvester.
Per accelerar las vaccinaziuns duain era apotechers ed apotecras, dentists e dentistas e tgirunz e tgirunzas dastgar vaccinar.
