Siglir tar il cuntegn

Exteriur Merkel vul 4 novs ministers

La chanceliera da la Germania Angela Merkel vul in cabinet pli giuven e cun dapli dunnas. La CDU votescha il glindesdi davart il nov contract da coaliziun.

Angela Merkel.
Legenda: Ils delegads da la CDU vegnan a decider il glindesdi. Keystone

La chanceliera da la Germania Angela Merkel ha la dumengia preschentà novs commembers per il cabinet da la coaliziun gronda.

4 novs e dus restan

Il conservativ Jens Spahn, che vala sco criticher da Merkel entaifer la partida, duai surpigliar il ministeri da sanadad. Sco ministra da furmaziun propona la chanceliera la delegada Anja Karliczek che vegn da la branscha da gastronomia ed è betg ina persuna enconuschenta en la scena da furmaziun e perscrutaziun. Julia Klöckner duai daventar ministra d'agricultura. Ella è fin ussa scheffa da la CDU en il Bundesland Rheinland-Pfalz. Helge Braun duai daventar schef da l'uffizi da chanceliers, vul dir minister d'affars spezials.

Gia part dal nov cabinet fan mo dus: Ursula von der Leyen, ch'è vegnida crititgada fermamain, duai restar en uffizi sco ministra da defensiun. E Peter Altmaier, ch'era fin uss il schef da l'uffizi da chanceliers duai restar en il cabinet sco minister d'economia.

La CDU decida il glindesdi

Il glindesdi vegn a sa mussar, sch'ils collegas da la CDU sustegnan questas midadas planisadas. Durant il di da partida extraordinari vegnan ils 1'001 a votar davart il contract da coaliziun cun la SPD. Er ils critichers da la chanceliera èn però s'exprimids postivmain tar las midadas.

Il è gartegià da metter ensemen in team persvadent cun testas cun experientscha e novas persunas che pon dar novs impuls.
Autur: Carsten LinnemannPresident da l'associaziun dal stand da mez e l'economia

Sch'ils commembers da la SPD han approvà il contract da coaliziun la dumengia, duai vegnir communitgà la dumengia.

RR novitads 06:00