Siglir tar il cuntegn

Exteriur Merkel na cuntanscha betg ses finamiras

La curta visita da la chanceliera tudestga Angela Merkel tar il president american Donald Trump n'ha betg manà ad in'avischinaziun dals interess visibla.

Angela Merkel e Donald Trump.
Legenda: L'atmosfera è dentant stada in zic meglra che tar il davos inscunter il mars avant in onn. Keystone

La chanceliera tudestga Angela Merkel ed il president american Donald Trump n'han gì in inscunter pli conciliant che spetgà. Trump pareva pli paschaivel e Merkel ha accentuà interess. Resultats concrets per s'avischinar en ils puncts dispitaivels n'hai però betg dà. Ni tar la dispita economica davart dazis da multa sin atschal ed aluminium ord l'Europa ni tar la cunvegna d'atom cun l'Iran ha il discurs da duas uras purtà fritg.

Sco gia tar l'inscunter cun il president franzos Emmanuel Macron, n'ha Trump betg vulì segirar, che la Germania vegnia exclusa dals dazis da multa sin atschal ed aluminium.

Quai vegn il president a decider.
Autur: Angela MerkelChanceliera tudestga

Uss giaschia vi dal president quant confrontativ ch'el veglia furmas las relaziuns cun l'Europa, hai gi num en circuls da la regenza. L'emprim resultat vegn vesaivel il prim da matg, cura ch'il termin per las excepziuns dals dazis da multa scroda.

Medem punct da vista – autras vias

Era malsegir resta co ch'ils Stadis Unids e l'Europa vegnian a sa cunvegnir pertutgant la cunvegna atomara cun l'Iran. Merkel ha defendì la cunvegna, Trump la metta en dumonda. Per Merkel saja la cunvegna stada in emprim pass per reducir las activitads nuclearas da l'Iran ed ina mesira che pussibilitescha da survegliar las activitads. Quai na tanschia però anc betg. I stoppia vegnir vitiers dapli.

Quest avis parta er ses collega american – las vias èn dentant differentas.

Nus stuain segirar che quest terribel reschim na vegn gnanc en vischinanza d'ina arma atomara.
Autur: Donald TrumpPresident american

Trump smanatscha perquai da betg vulair prolungar la cunvegna che scroda ils 12 da matg.

Dapli expensas da defensiun per la Nato

Per Trump investescha la Germania memia pauc per las expensas da defensiun da la Nato. Enfin il 2024 duai la Germania ed er ils auters pajais impunder 2% dal product naziunal per quest scopo. La Germania è cun 1,24% damai anc lunsch davent dad in, tenor Trump, «fair cumpart».

RR novitads 06:00