Siglir tar il cuntegn

Header

cuntegn

Exteriur Merkel: «Jau guard cun optimissem vers las negoziuns»

La chanceliera tudestga Angela Merkel ha appellà a l'UE d'entschaiver las contractivas cun la Svizra davart la circulaziun libra da persunas independent dals discurs cun la Gronda Britannia davart il Brexit.

Quai ha Angela Merkel ditg suenter l'inscunter cun il president da la confederaziun, Johann Schneider-Ammann. Vinavant ha Merkel punctuà che la Germania haja in grond interess vid ina buna cunvegna cun la Svizra, gia pervia dals blers cunfinaris tudestgs-svizzers.

Las tractativas cun la Svizra stoppian vegnir fatgas sco sch'i na dess nagin Brexit. La Germania veglia ina schliaziun che saja cumportabla cun la circulaziun libra da las persunas da l'UE. La Svizra haja il dretg da vegnir tractada sco pajais suveran cun ses giavischs politics.

Nagina spassegiada

Schneider-Amman ha discurrì d'ina cunvegna che duai vegnir realisada uschè svelt sco pussibel. Uschia dettia cundiziuns da basa claras per investiders. La schliaziun stoppia esser cumpatibla cun la circulaziun libra, dentant er chattar ina maioritad en la Svizra. Quai na saja nagina spassegiada.

Suenter l'iniziativa da l'immigraziun da la PPS il favrer stoppia il Cussegl federal chattar vias per franar l'immigraziun da or da l'UE. Tut tenor co l'iniziativa vegniss realisada pudess ella cuntrafar a la cunvegna da la libra circulaziun cun l'UE.

Suenter ch'il Cussegl naziunal era sa decidì per ina favurisaziun d'indigens light è uss il Cussegl dals chantuns al timun.

Quatter models èn en discussiun

La SPK (la cumissiun d'instituziuns politicas) discutescha il mument quatter concepts. Ina versiun da l'iniziativa che realisescha quella cun tut ils puncts, quai vul dir cun contingents e favurisaziun d'indigens. Las propostas dal Cussegl federal van en ina sumeglianta direcziun. Dumbers maximals duain dentant pir valair suenter avair surpassà ina tscherta valur minimala. Omaduas variantas discrimineschan abitants da l'UE e cuntrafan cun quai al contract da la libra circulaziun.

Auter dentant èsi cun la proposta dal Cussegl naziunal che pretenda in'obligaziun d'annunzia per plazzas avertas. L'uschenumnada "favurisaziun d'indigens light". Quella schliaziun ha la menda ch'ella realisescha be per part l'iniziativa.

RR novitads 17:00

Artitgels legids il pli savens