Siglir tar il cuntegn

Header

cuntegn

Exteriur Meimarakis sto furmar la nova regenza greca

Suenter ch’il primminister grec Alexis Tsipras è sa retratgs ha il manader da l’opposiziun, Evangelos Meimarakis, survegnì il mandat da furmar ina regenza nova. Oz vegnia Meimarakis a s’inscuntrar cun il president grec Prokopis Pavlopoulos, scriva sia partida nova democrazia.

Sco la constellaziun è en il parlament na vegn Meimarakis strusch ad avair schanzas da furmar ina coaliziun, uschia èsi probabel ch'i vegn tar elecziuns novas.

UE quinta cun la Grezia

Era suenter che Alexis Tsipras è sa retratgs sco primminister spetga la cumissiun da l’Uniun Europeica che la Grezia sa tegnia vid las cunvegnas dal program d’agid, quai ha ditg ina pledadra. In diplomat da l’UE ha ditg ch’ils contracts sajan vegnids fatgs cun la Grezia e betg cun Tsipras. Era la regenza nova saja obligada da sa tegnair vid la cunvegna.

Ruptura entaifer la partida Syriza

Tenor la stimaziun dal correspundent SRF, Werner van Gent, veglia Tsipras cumbatter cun las elecziuns novas la rebelliun entaifer sia partida Syriza. Tar l'ultima votaziun davart il program da spargn han 44 commembers da sia partida votà cunter il pachet. Uschia possia Tsipras realisar il program da spargn sulet cun l'agid da l'opposiziun. «A lunga vista n'èn quai naginas cundiziuns politicas stabilas» di Gent.

La popularitad da Tsipras è gronda. Tar in'enquista la fin da fanadur han 60% da la populaziun giuditgà a moda positiva sia lavur.

Tsipras beneventa elecziuns novas, el ha gia annunzià da probabel candidar anc ina giada.

RR novitads 06:00

Artitgels legids il pli savens